विवाहको खर्च कटाएर धुर्मुस सुन्तली फाउन्डेसनलाई आर्थिक सहयोग

काठमाडौँ । एक नवविवाहित जोडीले आफ्नो विवाहको खर्च कटौती गरी गौतमबुद्ध अन्तर्राष्ट्रिय क्रिकेट रंगशालालाई आर्थिक सहयोग गरेका छन् ।

जनस्तरबाट रकम संकलन गरी चितवनमा निर्माण भइरहेको गौतमबुद्ध अन्तर्राष्ट्रिय क्रिकेट रंगशाला निर्माण अभियानका लागि बुटवल निवासी लोकेश गिरी र पद्मा गिरीले आफ्नो विवाहको खर्च रकम कटौती गरी २२ हजार २ सय २५ रुपैयाँ सहयोग गरेका हुन् ।

सोमवार उक्त रकम धुर्मुस सुन्तली फाउण्डेसनलाई हस्तान्तरण गरेको फाउण्डेसनका अध्यक्ष सिताराम कट्टेलले जानकारी दिए ।

सहयोग रकम ग्रहण गर्दै फाउण्डेसनका अध्यक्ष कट्टेलले भने, “यस सहयोग र यस अभियानमा जोडिनुभएकोमा लोकेश गिरी ज्यू र पद्मा गिरी ज्यू साथै उहाँको सम्पूर्ण परिवारलाई हार्दिक धन्यवाद एवम् आभार ब्यक्त गर्न चाहान्छौं ।”

जनस्तरको सहयोग बाट बन्न लागेको यति ठुलो योजना सफल पार्न केही भएपनि सहयोग होस् भनी विवाह को खर्च कटाएर सहयोग गरेको दाता लोकेश गिरी बताउँछन् । गिरी यसअघि पनि जन्मोत्सवको अबसरमा समेत धुर्मुस सुन्तली को एकिकृत नमुना बस्ती, स्कुल, अपाङ्ग आश्रम , वृद्ध आश्रम, अस्पताल का बिरामी लगायत को लागि विभिन्न सहयोग गर्दै आएका थिए ।