स्वदेशी तथा विदेशी ब्राण्डका नक्कली मदिरा उत्पादन गरेको आरोपमा तीन पक्राउ

काठमाडौं : स्वदेशी तथा विदेशी ब्राण्डका नक्कली मदिरा उत्पादन गरेको आरोपमा तीन जनालाई प्रहरीले पक्राउ गरेको छ। पक्राउ पर्नेमा दोलखाको कालिञ्चोक गाउँपालिका-३ घर भई ललितपुरको कुपण्डोल बस्ने २७ वर्षीय निरज उप्रेती, स्याङ्जाको गल्याङ नगरपालिका-९ घर भई टोखा बस्ने २६ वर्षीय धर्मी गौडेल र सिन्धुलीको तीनपाटन गाउँपालिका-२ घर भई हाल टिकाथली बस्ने २६ वर्षीय गणेश बहादुर रानामगर रहेका छन्। 

काठमाडौं उपत्यकामा स्वदेशी तथा विदेशी ब्राण्डका गुणस्तरहीन नक्कली मदिराहरू उत्पादन गरी कालोबजारी भइरहेको गोप्य सूचनाका आधारमा उपत्यका अपराध अनुसन्धान कार्यालयबाट खटिएको विशेष अनुसन्धान टोलीले उनीहरूलाई पक्राउ गरेको हो।