March 16, 2020
काठमाडौं । कलंकी–कोटेश्वर सडकखण्डमा ट्राफिक नियम उल्लंघन गर्नेलाई १५ सय जरिवाना गर्ने गरी नयाँ नियम लागू गरिएको छ । आइतबारबाट यो सडक खण्डमा चल्ने यात्रु तथा मालबाहक सवारीसाधनलाई बायाँ सर्भिस लेनबाट र तीव्र गतिमा हुँइकिने निजी तथा साना सवारीलाई दाहिने लेनबाट गुड्ने गरी नयाँ नियम लागू गरिएको हो ।
उप्त्यकाका दुई जिल्लाका प्रमुख जिल्ला अधिकारी जनकराज दाहाल (काठमाडौं), भागिरथ पाण्डे (ललितपु) र महानगरिय ट्राफिक प्रहरी महाशाखाका प्रमुख भीमप्रसाद ढकालले संयुक्तरूपमा एक कार्यक्रमकाबिच संयुक्त रुपमा रिवन काटेर नयाँ नियम सुरु गरेका हुन्।
सडक दुर्घटना न्यूनीकरणसँगै सडकमा रहेको लेनलाई अनुशासित एवं व्यवस्थित रुपमा पालना गराउन, सवारी आवागमनलाई सहजता ल्याउन र ट्राफिक नियम पालनाको प्रवृत्ति बसाउन उक्त नियम लागू गरिएको महाशाखाका प्रमुख प्रहरी वरिष्ठ उपरीक्षक भीमप्रसाद ढकालले बताए।
महाशाखाका प्रवक्ता प्रहरी उपरीक्षक जीवनकुमार श्रेष्ठले सडक सुरक्षा र त्यसको प्रयोग सम्बन्धी सबै स्थानीय तहलगायत अन्य सरोकारवाला निकायलाई जिम्मेवारपूर्ण नियम पालना गर्न ट्राफिक प्रहरी खट्टाइएको बताए ।नियम नमान्ने सवारीसाधनलाई प्रहरीले एक हजार पाँचसयसम्म जरिवाना गर्न सक्नेछ ।
प्रकाशित मिति:March 16, 2020
