January 9, 2022
सीपयुक्त जनशक्ति भएका प्रदेशका रुपमा विकास गर्छाैँ: मुख्यमन्त्री पाण्डे
चितवन-वाग्मती प्रदेशका मुख्यमन्त्री राजेन्द्रप्रसाद पाण्डेले आफ्नो प्रदेशलाई सीपयुक्त जनशक्ति भएको प्रदेशका रुपमा विकास गर्ने बताउनुभएको छ ।
चितवन महोत्सबको १३औँ संस्करणको आज यहाँ उद्घाटन गर्दै उहाँले आन्तरिक रुपमा सीपयुक्त जनशक्ति उत्पादन भएसँगै बाहिरबाट जनशक्ति ल्याउनु नपर्ने बताउनुभयो ।
मुख्यमन्त्री पाण्डेले भन्नुभयो, “तीन महिनासम्म प्रदेश सरकारले खर्च गरेर सीपमूलक तालिम दिन्छ ।”
तालिम प्राप्त जनशक्तिले सहजै काम पाउने उहाँको भनाइ थियो ।
उद्योगमा लगानी मैत्री वातावरण बनाउने भन्दै उहाँले ट्रेडबाट देशको विकास हुन सम्भव छैन भन्नुभयो ।
बन्द भएका उद्योगहरू सञ्चालनका लागि आवश्यक गृहकार्य सुरु गरिएको पाण्डेले बताउनुभयो ।
उहाँले भन्नुभयो, “उद्योगपति बन्न आफैँले उद्योग सञ्चालन गर्नुपर्छ । बाहिरबाट ल्याएर सामान बेचेर उद्योगपति बनिँदैन ।”
राष्ट्रिय आवश्यकता हेरेर स्वदेशमा नै उत्पादन गर्नुपर्नेमा उहाँले जोड दिनुभयो ।
सरकारी विद्यालयमा अध्ययनरत छात्रालाई प्रदेश सरकारले निःशुल्क शिक्षा दिने उहाँले बताउनुभयो ।
मुख्यमन्त्री पाण्डेले लोपोन्मुख जातिलाई हरेक पालिकाबाट एकजनाका दरले एसइईपछि प्राविधिक शिक्षा दिएर पालिकामा नै रोजगारीको अवसर सृजना गर्ने गरी प्रदेश सरकारले काम गरेको जानकारी दिनुभयो ।
कार्यक्रममा उद्योग वाणिज्य महासङ्घका वरिष्ठ उपाध्यक्ष चन्द्र ढकालले सरकारले नीतिगत रुपमा उद्योग व्यापारका क्षेत्रमा सहयोग गर्नुपर्ने बताउनुभयो ।
उहाँले भन्नुभयो, “५० वर्षअघिको नियम कानुनले काम गर्न अफ्ठ्यारो भयो ।”
सोही अवसरमा प्रतिनिधिसभा सदस्य कृष्णभक्त पोख्रेल, बागमती प्रदेश उद्योग वाणीज्य तथा आपूर्तिमन्त्री मिलनबाबु श्रेष्ठ, भरतपुर महानगरपालिका प्रमुख रेनु दाहाल, नेपाली कांग्रेस चितवनका सभापति जीतनारायण श्रेष्ठ, एमालेका नेता रामप्रसाद न्यौपाने, नेकपा (माओवादी केन्द्र)का अध्यक्ष यमबहादुर परियार, नेकपा (एकीकृत समाजवादी)का जिल्ला उपाध्यक्ष कृष्णराज न्यौपाने, उद्योग सङ्घ चितवनका अध्यक्ष त्रिलोचन कँडेल लगायतले कोभिडबाट जोगिएर महोत्सवमा सहभागी हुन आग्रह गर्नुभएको थियो ।
उद्योग वाणिज्य सङ्घ चितवनले महोत्सवको आयोजना गरेको हो ।
महोत्सव मूल आयोजक समितिका संयोजक एवं सङ्घका अध्यक्ष राजु श्रेष्ठले महोत्सवबारे विस्तृत जानकारी गराउनुभएको थियो ।
महोत्सव माघ ४ गतेसम्म सञ्चालन हुनेछ ।
विसं २०५३ सालदेखि हरेक दुई वर्षमा महोत्सव हुँदै आइरहेको भए पनि अघिल्लो वर्ष हुनुपर्ने महोत्सव कोरोनाका कारण एक वर्ष पछाडि धकेलिएको हो ।
महोत्सवको टिकटसँगै सबैलाई मास्क प्रदान गरिएको छ । यस पटकको महोत्सवमा कृषि, अटो, मेड इन नेपाल, इलेक्ट्रोनिक र आइटीका छुट्टै छुट्टै परिसर रहेका छन् ।
विशेष गरी चितवनको आर्थिक सामाजिक र सांस्कृतिक रुपान्तरण गर्नका लागि यस पटक महलाई प्रवद्र्धन गर्नेगरी मौरीको डमी महोत्सवभित्र राखिएको छ ।
बगैँचा, कृषि परिसर, पोल्ट्री परिसर, बाल उद्यान, गार्मेन्ट सामग्री सहित महोत्सवमा रहेका छन् ।
चारवटा विशेष र डोमसहित महोत्सवमा ४०० वटा स्टल रहेका छन् ।
महोत्सवमा कृषि, शिक्षा, स्वास्थ्य, पोल्ट्री र उद्योग प्रवद्र्धनका गतिविधि सञ्चालन हुनेछन् ।
दश दिनसम्म चल्ने महोत्सवमा खेलकुद, जलयात्रा, स्वास्थ्य सेवा, आदिवासी जनजातिको वेशभूषा र कला संस्कृति झल्किने मनोरञ्जनात्मक कार्यक्रम, कृषिउपज प्रदर्शनी र बाल उद्यान राखिने आयोजकले जनाएको छ ।
महोत्सव सुरु हुनुअघि नारायणगढ बजार क्षेत्रमा शोभायात्राको आयोजना गरिएको थियो ।
सीपयुक्त जनशक्ति भएका प्रदेशका रुपमा विकास गर्छाैँ: मुख्यमन्त्री पाण्डे
प्रकाशित मिति:January 9, 2022
