नेप्सेमा झिनो अंकको सुधार

काठमाडौं । दशैं पछिको दोस्रो कारोबार दिन पनि धितोपत्रको दोस्रो बजार सुस्त देखिएको छ। लगानीकर्ताहरु अझै ‘फेस्टिभ मुड’ मा भएका कारण यस दिन बजार सुस्त देखिएको हो।

नेपाल स्टक एक्सचेञ्ज (नेप्से)मा साताको दोस्रो कारोबारको दिन झिनो अंकको सुधार देखिएको छ । आज नेप्से ३.०४ अंकले बढेर एक हजार ८ सय ७८ दशमलब ७० विन्दुमा बन्द भएको हो । 

त्यस्तै, आज कारोबार रकम भने घटेको छ । आइतबार ७४ करोड २९ लाख रुपैयाँ बराबरको कारोबार भएको नेप्सेमा आज ६९ करोड ४२ लाख रुपैयाँमा सिमित भएको छ । नेप्सेका अनुसार आज कारोबार भएका १२८ कम्पनीको शेयरमूल्य बढेको छ भने ९७ कम्पनीकोे शेयरमूल्य घटेको छ । १४ वटा कम्पनीको शेयरमूल्य स्थिर रहेको छ ।    

आज पञ्चमन्यामाइ हाइड्रोपावर कम्पनी लिमिटेडको शेयरमूल्य ७.८२ प्रतिशतले बढेर प्रतिकित्ता १७७.९० रुपैयाँ पुगेको छ । यस्तै, आज मन्दाकिनी हाइड्रोपावर लिमिटेडको शेयरमूलय ५.८९ प्रतिशतले बढेको छ भने सुपर मादी हाइड्रोपावर लिमिटेडको शेयरमूल्य ५.२६ प्रतिशतले बढेको छ ।    

साेमबारकाे काराेबारमा सोनापुर मिनिरल्स एण्ड वेल्स लिमिटेडका लगानीकर्ताहरुले सर्वाधिक गुमाएका छन् । यसको शेयरमूल्य आज १० प्रतिशतले घटेको छ । नेप्सेका अनुसार कारोबारको आधारमा आज सबैभन्दा बढी साधना लघुवित्त वित्तीय संस्थाको प्रमोटर शेयरको भएको छ । यस कम्पनीको आज ३ करोड ६० लाख रुपैयाँ भन्दा बढीको कारोबार भएको छ ।  

१३ उपसमूहमध्ये यस दिन १० उपसमूहको परिसूचक बढेको छ भने ३ उपसमूहको परिसूचक घटेको छ। यस दिन परिसूचक बढेका उपसमूहको वृद्धिदर भने १ प्रतिशतभन्दा कम रहेको छ। यस दिन होटल तथा पर्यटन, उत्पादन तथा प्रशोधन र म्युचुअल फण्ड उपसमूहको परिसूचक घटेको हो।