October 29, 2021
काठमाडौँ-नेपाल बार एसोसियसनले प्रधानन्यायाधीश चोलेन्द्रशमशेर राणाले राजीनामा नदिने भएपछी नयाँ रणनीति बनाउन बैठक बोलाएको छ ।
कानुन व्यवसायीहरुको छाता संगठन नेपाल बार एसोसियसनको भबनमा आज अपरान्ह बैठक बस्न लागेको हो ।
बारको अघिल्लो बैठकले प्रधानन्यायाधीश राणालाई राजीनामा दिन आह्वान गरेको थियो ।
बारसँगै सर्वोच्चमा न्यायाधीशहरुले समय राजीनामा दिएर मार्ग प्रशस्त गर्न माग गर्दा पनि प्रधानन्यायाधीश राणाले राजीनामा नदिने अडान लिँदै आएका छन् ।
उनले आफू विधि प्रक्रियाबाट प्रधानन्यायाधीशमा नियुक्त भएकाले कसैले राजीनामा माग्दैमा नदिने अडान दोहोर्याउँदै आएका हुन्।
बारले प्रधानन्यायाधीशको राजीनामा माग गर्दै आन्दोलनको घोषणा गर्ने बताएको थियो ।
सोहीअनुसार आन्दोलनका कार्यक्रमको तयारी गर्न बार एसोसियसनको बैठक बस्न लागेको अध्यक्ष चन्डेश्वर श्रेष्ठले जानकारी दिए । ‘बैठकले अब के कसरी अघि बढ्ने भन्ने स्पष्ट निर्णय गर्छ’, अध्यक्ष श्रेष्ठले भने।
बारले पहिलो चरणमा सर्वोच्च अदालतमा मात्रै आन्दोलन गर्ने र राजीनामा नआए विस्तारै सबै बार इकाइसम्म आन्दोलन विस्तार गर्ने निर्णय गरेको छ।
प्रकाशित मिति:October 29, 2021
