११ लाख बराबरको सुनका गहना चोरी

भक्तपुर । ११ लाख बराबरको सुनका गहना चोरी भएको छ । मध्यपुर ठिमी नगरपालिका ३ गठ्ठाघर डेरा गरी बस्ने पाँचथर थाङवरक गाउँपालिका ४ घर भएका ३५ वर्षीय ज्ञान बहादुर दाहालको कोठाबाट करिब ११ लाख रुपैयाँ बराबरको विभिन्न सुनका गहना बुधबार राति चोरी भएको हो ।

उनको कोठामा कोही नभएको अवस्थामा ढोकाको ताला फोडी दराजबाट सुनका विभिन्न गहना चोरी गरेको प्रहरीले जानकारी दिएको छ । चोरी भएकोजानकारी प्राप्त हुनासाथ प्रहरी वृत्त ठिमीबाट खटिएको प्रहरी घटना स्थल पुगेको थियो ।

चोरीमा संलग्न फरार व्यक्तिहरुको खोजी भइरहेको प्रहरीले जनाएको छ ।

घटनाका सम्बन्धमा प्रहरीले आवश्यक अनुसन्धान गरिरहेको बताएको छ ।