October 28, 2021
काठमाडौं- मुख्यमन्त्री अष्टलक्ष्मी शाक्यले राजिनामा दिएसँगै वाग्मती प्रदेशमा ५९ जना सभासदको सर्मथन सहित मुख्यमन्त्रीमा दावि गरेका राजेन्द्र पाण्डेले आज सपथ लिने भएका छन् ।
एकीकृत समाजवादी, संसदीय दलका नेता राजेन्द्र पाण्डेसँगै गठबन्धनका प्रत्येक दलबाट एक एक जना गरी चार मन्त्रीले सपथ लिने तयारी गरेको बताईएको छ ।
मुख्यमन्त्रीको पदबाट अष्टलक्ष्मी शाक्यले राजीनामा दिएसँगै नयाँ सरकार गठनका लागि प्रदेश प्रमुखबाट बिहीवार अपरान्ह ३ बजेको समयसीमाभित्र मुख्यमन्त्रीको लागि दाबी पेश गर्न आह्वान भएको थियो ।
प्रदेश प्रमुखको आह्वानसँगै नयाँ सरकार गठनका लागि मुख्यमन्त्रीमा सत्ता गठबन्धनको तर्फबाट नेकपा (एकीकृत समाजवादी) संसदीय दलका नेता राजेन्द्र पाण्डेबाट ५९ सांसदको सर्मथन सहित दाबी पेश भएको थियो । सरकार बनाउन ५५ सांसद आवश्यक पर्नेमा प्रस्तावित मुख्यमन्त्री पाण्डेलाई ५९ सांसदको समर्थन प्राप्त भएको छ ।
प्रदेशसभाका एक सदस्यका अनुसार आज पाण्डेसँगै नेपाली कांग्रेसबाट कृष्ण भडेल, माओवादी केन्द्रबाट कुमारी मोक्तान र नेकपा एकीकृत समाजवादीबाट कृष्ण खनालले पनि मन्त्रीको रुपमा सपथ लिने भएका छन् ।
बाँकी मन्त्रीहरूको चयन भने तिहारपछि मात्रै गरिने सत्ता गठबन्धनमा सहमति भएको जनाइएको छ ।
प्रकाशित मिति:October 28, 2021
