Month: February 2022

निर्माणाधीन आयोजनाको दुर्घटना छानबिन गर्न समिति गठन

काठमाडौँ-सरकारले सोलुखोला दूधकोशी जलविद्युत् आयोजनामा सोमबार भएको दुर्घटनाको छानबिनका लागि तीन सदस्यीय छानबिन समिति गठन गरेको छ ।

ऊर्जा, जलस्रोत तथा सिँचाइ मन्त्रालयका सहसचिव चिरञ्जीवी चटौतको संयोजकत्वमा छानबिन समिति आज गठन गरेको हो ।

समितिका अन्य सदस्य भने तोक्न बाँकी रहेको ऊर्जा, जलस्रोत तथा सिँचाइ मन्त्रालयले जनाएको छ ।

ऊर्जामन्त्री पम्फा भुसालले दुर्घटनाप्रति चासो व्यक्त गर्दै तत्काल छानबिन प्रक्रिया अगाडि बढाउन निर्देशन दिनुभएको थियो ।

सरकारले निधन भएका प्राविधिक कर्मचारीप्रति श्रद्धाञ्जलि प्रकट गर्दै शोकसन्तप्त परिवारमा समवेदना प्रकट गरेको छ ।

दुर्घटनामा थप एक कर्मचारी घाइते हुनुभएको छ ।

साहस ऊर्जाले प्रवद्र्धन गरिरहेको ८६ मेगावाट क्षमताको सोलुखोला दूधकोशी जलविद्युत् आयोजनाको परीक्षणका क्रममा पाइप विष्फोट भई इञ्जिनीयर सुवासराज रेग्मी र कर्मचारी अर्जुन थापाको निधन भएको हो ।

पेनस्टक पाइपको हाइड्रोलिक परीक्षणका क्रममा पाइप फुट्दा उक्त दुर्घटना हुन पुगेको हो ।

प्रवद्र्धक कम्पनीका अनुसार पाइपको ज्वाइनमा परीक्षण गर्दा दुर्घटना भएको हो ।

आयोजनामा प्रयोग गरिएका हाइड्रो–मेकानिकलतर्फको काममा दुर्घटनाले प्रश्न खडा गरेको छ ।

ऊर्जामन्त्री भुसालले दुई युवा तथा प्रतिभाशाली प्राविधिकको असामयिक निधनको खबरले आफूलाई अत्यन्त दुःख लागेको बताउनुभएको थियो ।

मन्त्री भुसालले उहाँहरुप्रति श्रद्धाञ्जलि व्यक्त गर्दै परिवारजन, आफन्त तथा सहकर्मीमा समवेदना प्रकट गर्नुभएको छ ।

साहस ऊर्जाका प्रमुख हिमप्रसाद पाठकले दुर्घटनाको बारेमा आन्तरिकरुपमा नै छानबिन भइरहेको र घाइतेको उपचार भइरहेको जानकारी दिनुभयो ।

निर्माणाधीन आयोजनाको दुर्घटना छानबिन गर्न समिति गठन

सप्तकोशी बैंक प्रकरण: सिइओले भट्टराईलाई फसाएको आरोप

विराटनगर-विराटनगरस्थित सप्तकोशी बैंकको रकमको हिनामिनामा पक्राउ परेका हिमाल भट्टराई निर्दोश रहेको आफन्तले दावी गरेका छन् ।

आफन्तले बैंकका प्रमुख कार्यकारी नवीन सुवेदीले हिमाल भट्टराईलाई फसाएको आरोप लगाउदै सुवेदीलाई पक्राउ गरी छानबिन गर्नुपर्ने माग गरेका छन् ।

हिमालका बुबा अमृतप्रसाद भट्टराई र भाइ मनोज भट्टराईले सोमबार पत्रकार सम्मेलन गरी सात वर्षअघि हिमाललाई जागिर लगाउने सुवेदीले फर्जी कारोबार गरी हिमाललाई फसाएको प्रशस्त प्रमाण फेला परेको बताएका छन्।

बैंकमा करिब रु १६ करोड हिनामिना भएको र सो रकम प्रमुख कार्यकारी सुवेदीकी बहिनी भनिने बबिता सुवेदीको खाताबाट करिब रु १४ करोडभन्दा बढी रकमको कारोबार देखिएकाले सुनियोजित तरिकाले भट्टराई फँसेको बताइएको छ ।

रकमको कारोबार हुने शाखामा नरहेका भट्टराईलाई प्रमुख कार्यकारी सुवेदीले नै पटकपटक रकम झिक्न लगाई सो रकम लिने गरेको हिरासतमा रहेका हिमालले आफ्ना बुबालाई भनेका छन् ।

“मेरो छोरा निर्दोष छ । परिबन्दमा परेर फसेको हो”, अमृतप्रसादले भनेका छन् ।

सप्तकोशी बैंक प्रकरण: सिइओले भट्टराईलाई फसाएको आरोप

सरुवाविरुद्ध श्रमका कर्मचारीद्वारा उच्च अदालतमामा मुद्दा दायर

काठमाडौँ-उपसचिवसहित चार अधिकृतले सरुवा बदरको माग गर्दै उच्च अदालत पाटनमा मुद्दा दायर गरेका छन् ।

श्रम मन्त्रालयका उपसचिव भोलानाथ गुरागाईँ र शाखा अधिकृतत्रय ताम्रराज काफ्ले, मातृका सापकोटा र हरिकृष्ण बुढाथोकीले सरुवाविरुद्ध मुद्दा दायर गरेका हुन् ।

आफूहरूको श्रम सहचारीमा पठाउने सूचना प्रकाशित हुनै लाग्दा सरुवा भएकोले सो चित्त नबुझेपछि सङ्घीय मामिला तथा सामान्य प्रशासन मन्त्रालयको सरुवाविरुद्ध अदालत गएको उनिहरुले बताएका छन् ।

तोकिएको कार्यालयमा एक वर्षदेखि कार्यरत रहेको हुनुपर्ने काउन्सेलर(श्रम) तथा श्रम सहचारी छनौट तथा नियुक्ति सम्बन्धी कार्यविधि तथा मापदण्ड-२०७३ मा उल्लेख छ ।

उपसचिव भोलानाथ गुरागाईँ २०७५ भदौ २७ गतेदेखि र अधिकृतत्रय काफ्ले २०७६ साउन १३, सापकोटा २०७६ साउन २२ र बुढाथोकी २०७५ साउन ११ गतेदेखि श्रम मन्त्रालय तथा अन्तर्गतको कार्यालयमा कार्यरत छन् ।

सरुवा नियमित प्रक्रिया भएको र ती कर्मचारीहरूको दुई वर्ष भन्दा बढी अवधि नै भइसकेकाले सरुवा भएको मन्त्रालयका सहसचिव एवं प्रवक्ता डण्डुराज घिमिरेले बताए ।

घिमिरेले दुई वर्ष पुगेको कर्मचारीलाई सरकारले सरुवा गर्न सक्ने व्यवस्था निजामती सेवा ऐन तथा नियमावलीले गरेको बताएका छन् ।

सरकारी अड्डाहरूमा लामो समयसम्म एउटै कर्मचारी राखिराख्दा सेटिङ मिलाउने र जति सुधार गर्न खोज्दा पनि परिणाम नदेखिने समस्या आउने हुन्छ ।

अवधि पुगेको कर्मचारीको हकमा सम्बन्धित मन्त्रालयको आवश्यकता तथा मागअनुसार सरुवा गर्ने गरिएको सङ्घीय मामिला तथा सामान्य प्रशासन मन्त्रालयको भनाई रहदै आएको छ ।

सरुवाविरुद्ध श्रमका कर्मचारीद्वारा उच्च अदालतमामा मुद्दा दायर

पशुपतिनाथमा रातभर धनुर्मास पूजा, आज मन्दिर बन्द

प्रत्येक वर्ष सूर्यनारायण धनु राशिमा रहेका बेला शुभ साइत जुराएर पशुपतिनाथ मूल मन्दिरमा गरिने धनुर्मास पूजा सोमबार रातभर विधिपूर्वक गरिएको छ ।

धनुर्मास पूजामा पशुपतिनाथका चारै जना भट्ट ब्राह्मण, पालोवाला भण्डारी, श्रीको भान्छे र अन्य ब्राह्मण पनि सहभागी हुने विधि छ ।

पशुपतिनाथलाई आदिकलश, पञ्चामृत स्नान, तैलाम्भ्य, श्रीयन्त्र लेखन, श्रृङ्गार, श्री चक्रको पूजा, धुप, बत्ती र बालभोग अर्पण गरी मूलभोगका रूपमा भने खिचडी अर्पण गर्ने परम्परा छ ।

धनुर्मास पूजाका क्रममा अमालकोट कचहरीका तर्फबाट खिचडी भोग दिइएको द्वारे पूर्ण डङ्गोलले जानकारी दिनुभयो ।

पशुपतिनाथमा महाभोगका लागि ब्राह्मणले दुईवटा खँडकुलामा खिचडी बनाउँछन् ।

एउटामा सख्खरसहितको र अर्कोमा चिनीसहितको खिचडी बनाउने गरिन्छ ।

अरु बेलामा पशुपतिनाथमा लगाइने भोगमा नुनिलो सामग्री हुन्छ ।

आज गुलियो र चिल्लो सामग्री चढाउने विधि रहेको पशुपति क्षेत्रका मूर्त अमूर्त संस्कृतिका बारेमा विशेष खोज गरिरहनुभएका कर्मचारी बरुण खतिवडाले जानकारी दिनुभयो ।

पुस महिनाभर सूर्यनारायण धनु राशिमा हुन्छन् ।

प्रत्येक वर्ष पुस महिनामा बढी भीडभाड नहुने दिनको साइत जुराएर पशुपतिनाथ मूल मन्दिरमा धनुर्मास पूजा आराधना गर्ने परम्परा छ ।

चान्द्रमास र सौरमास दुवै पुस महिनामा पारेर धनुर्मास पूजाको साइत निकालिन्छ ।

नौपटकसम्म धनुर्मास पूजा गर्ने परम्परा अहिले लोप

पहिले पुस महिनामा नौपटकसम्म धनुर्मास पूजा गर्ने गरिएकामा त्यो परम्परा अहिले लोप भइसकेको छ ।

त्यसबेला भक्तजनले पनि आफ्नो खर्चमा पनि धनुर्मास पूजा गर्न पाउँथे । यो परम्परा पनि अहिले लोप भइसकेको छ ।

धनुर्मास पूजा गर्नुअघि सोमबार बिहान पशुपतिनाथलाई चिसोबाट बचाउन तातोपानीले स्नान गराइएको थियो ।

बाला चतुर्दशीदेखि नै चिसो लाग्ने भएकाले पशुपतिनाथलाई तातोपानीले स्नान गराउने परम्परा छ ।

पानीमा बस्ने माछासमेत चिसोबाट बच्न पानीको सतहमुनि बस्ने मीनपचासको समयमा पशुपतिनाथलाई पनि चिसोबाट बचाउन धनुर्मास पूजासहित खिचडी खुवाउने वैदिक सनातनी परम्परा छ ।

सोमबार रातभर धनुर्मास पूजा गरेपछि आज पशुपतिनाथलाई उपवास राख्ने गरिन्छ ।

आज बिहानैदेखि बेलुकीसम्म भक्तजनका लागि पशुपतिनाथ मन्दिर बन्द गरिन्छ । बिहान १२ बजेसम्म एउटा ढोका भने खोलिन्छ ।

उपवासका दिन बिहानै महादेव कैलाश एवं शिवपुरी डाँडामा गएर तोरीको तेल लगाएर घाममा शयन गर्नुहुने धार्मिक विश्वाससमेत परम्परादेखि रहेको छ ।

यसै विश्वासमा आज बिहानै पशुपतिनाथलाई तोरीको तेल लगाउने परम्परा सुरु भएको हो ।

महादेवडाँडामा घाम तापेर बस्ने विश्वासमा कैलाशमा दिनभर खिचडी बनाएर खाने परम्परा भने विगत १६ वर्षदेखि लोप भएको खोजकर्ता खतिवडा बताउनुहुन्छ ।

बेलुकी भने महादेव कैलाश, शिवपुरी डाँडाबाट घाम तापेर फर्कनुहुने विश्वासमा नियमित आरती गरिन्छ ।

बुधबार बिहानदेखि भने नियमित पूजा आराधना गरी भक्तजनका लागि मन्दिर खुलाइने पशुपति क्षेत्र विकास कोषका कार्यकारी निर्देशक डा घनश्याम खतिवडाले राससलाई जानकारी दिनुभयो ।

सामान्य प्रसाशन कर्मचारी महाशाखामा आजबाट सह-सचिब बिष्ट

काठमाडौँ-संघिय तथा सामान्य प्रशासन मन्त्रालयको कर्मचारी महाशाखामा रघुराम बिष्टले आजबाट जिम्मेवारी सम्हाल्नु भएको छ ।

सो महाशाखामा कार्यरत रहनु भएको राजिव पोखरेल श्रम तथा रोजगार मन्त्रालयमा सरुवा भएसँगै सह सचिब बिष्ट सामान्य प्रशासन मन्त्रालयमा सरुवा भएर आउनुभएको हो ।

केही दिन अघि सामान्य प्रशासन मन्त्रालयमा सरुवा हुनुभएका बिष्टले आजबाट जिम्मेवारी सम्हाल्नु भएको हो ।

सहसचिव रघुराम बिष्ट लामो समय प्रशासन क्षेत्रमा कार्यरत प्रशासक हुनुहुन्छ ।

उहाँले आफ्नो अहिले सम्मको कार्यकालमा स्वास्थ्य मन्त्रालय, सुचना तथा प्रशारण बिभाग, सुदुर पश्चिम प्रदेश सामाजिक बिकास मन्त्रालय, सहरी तथा गरिबी निवारण मन्त्रालय, कृषि मन्त्रालय लगायतमा कर्मचारी शाखा प्रमुख भएर कुसल प्रशासकको भुमिका निर्वाह गरिसक्नु भएको छ ।

दुरदर्शी, छिटो निर्णय दिन सक्ने प्रशासकको रुपमा उहाँ प्रशासन वृतमा परिचित रहदै आउनु भएको छ ।

सरल र सहज स्वभावका धनी सहसचिव बिष्टले जनताका पिरमर्का चाडो बुझने प्रशासकको रुपमा आफ्नो परिचय बनाउनुभएको छ ।

सामान्य प्रशासन मन्त्रालयको कर्मचारी महाशाखा देशभरका निजामती कर्मचारी परिचालन गर्ने महाशाखा हो ।

सामान्य प्रशासन मन्त्रालयको कर्मचारी महाशाखामा उहाँको आगमनसँगै महाशाखाको कार्यशैली तथा सरुवा पदस्थापना लगायत महाशाखाको कार्यमा नजिर स्थापना हुनेगरी प्रभाबकारी कार्य सञ्चालन हुने आम निजामती प्रशासकको अपेक्षा गरेको देखिन्छ ।

हाल उक्त मन्त्रालयको सचिवमा सुरेश अधिकारी हुनुहुन्छ । सचिव अधिकारी निजामती क्षेत्रमा सरल र भद्र मिजास स्वभाबका प्राज्ञिक ब्यक्तित्वको रुपमा समेत परिचित हुनुहुन्छ ।

सामान्य प्रसाशन कर्मचारी महाशाखामा आजबाट सह-सचिब बिष्ट